En pouco tempo pasamos da reputación baseada en iso de “de quen ves sendo” e do currículo, a un tempo dominado pola IA no que podes presumir de ser un experto autorizado a golpe de ChatGPT. Cremos todo? Como saber se fala un algoritmo? Propoñemos unha metodoloxía para validar a pegada dixital, poñer en valor a credibilidade e, sobre todo, apostar pola comunidade como a mellor maneira de contrastar en quen cremos.
A comunidade WordPress é un mecanismo en si mesmo para coñecer a fiabilidade e consolidar unha reputación que non xorde de resultados reciclados.
Son Eurídice, xornalista chegada dos “vellos tempos” do analóxico. Iso fainos posuidora da calidade de ter vivido un cambio de Era porque, ¡deliro coa amplificación de sentidos que aporta o mundo dixital!
A credibilidade e a reputación ou marca persoal son bandeiras que considero cruciais. Búscoas como perliñas no medio de tanta automatización. Promover un humanismo dixital é fundamental para manternos conectados á terra, aos corpos, ás mentes.
O mundo WordPress, coa súa intensa comunidade, achéganos algunhas claves e valores para continuar vivindo nun mundo centrado nas persoas.
